Tèarmann Nàdair Nàiseanta Chreag Eileachaidh - bileag an luchd-tadhail
Read in English / Leugh ann am Beurla
Fàilte gu Tèarmann Nàdair Nàiseanta Chreag Eileachaidh
Tha Tèarmann Nàdair Nàiseanta Chreag Eileachaidh faisg air an Aghaidh Mhòir na mheasgachadh mìorbhaileach de choille-bheithe, blàrain fhosgailte agus lochan air an cuairteachadh le craobhan, ag èirigh gu mullach creagach le seallaidhean mìorbhaileach a-mach air Pàirc Nàiseanta a’ Mhonaidh Ruaidh. ’S e ‘àite creagach’ as ciall dha ainm an Tèarmainn. Tha Creag Eileachaidh air aonan de naoi de thèarmainn nàdair nàiseanta ann am Pàirc Nàiseanta a’ Mhonaidh Ruaidh agus timcheall oirre.
![An aerial view of the old reservoir and birch woodland at Craigellachie](/sites/default/files/styles/embedded/public/2023-07/Craigellachie_jpg_JPEG%20Image%20Original%20Size_m209991.jpg?itok=g8UJH7HC)
An rathad a Chreag Eileachaidh
Na chì thu
Eòin-chreachaidh
Bho àm gu àm bidh càraid de sheabhagan-gorma a’ sìolachadh air a’ chreig, agus bidh eun-creachaidh nas motha, an clamhan, a’ cumail faire air an leathad cuideachd.
Dìtheanan
Chomharraicheadh còrr is 350 gnè lusan ann an Creag Eileachaidh, eadar lusan a tha titheach air dubhar leithid an t-sàil-chuach fhìnealta agus lus na gaoithe a bhios a’ tighinn fo bhlàth as t-earrach. Cùm sùil a-mach airson cairt-làir nan duilleagan buidhe mu na slighean coiseachd.
Beathaichean
Bidh losgainn, màgagan agus an dearcan-uisge spliutach uile air an tarraing leis a’ chuid fhliuch den Tèarmann, agus chithear dearcan-luachrach coitcheann is dall-chnuimhean bho àm gu àm gam blianadh fhèin air bruachan blàth. Ann am mìosan a’ gheamhraidh bidh am fiadh-ruadh san Tèarmann còmhla ris an earb-ruadh, dham bheil e càirdeach, agus chìthear iad air na ceuman-coiseachd tron latha an-dràsta is a-rithist.
Craobhan
Coltach ri iomadh coille-bheithe air a’ Ghàidhealtachd, bidh craobhan Chreag Eileachaidh a’ cinntinn ann an ùir bhochd, dheagh-thraoghte.
Cùm sùil a-mach airson craobhan-beithe fa leth a tha air tighinn gu inbhe is gu ìre. Tha coltas uasal orra, len cuid mheanglan fìnealta is dualan de dhuilleagan uaine. ’S e ‘Bean-uasal na Coille’ a chanar riutha.
Am measg nan craobh eile ann, tha an critheann, caorann, calltainn, fiodhagach, seileach agus giuthas-Albannach. Dh’fhaodadh gum faic thu preasan aitinn is roid an siud isan seo cuideachd.
![View over the old reservoir at Craigellachie](/sites/default/files/styles/embedded/public/2023-07/Craigellachie-D9553_jpg_JPEG%20Image%20Original%20Size_m21116_0.jpg?itok=zBhEHVPd)
Biastagan
Bidh na lochanan a’ tàladh tairbh-nathrach is cruinneagan, nam measg sgiabair na Gàidhealtachd agus tarbh-nathrach òr-fhàinneach. Tha Creag Eileachaidh ainmeil cuideachd airson leòmain leithid an t-sìneadair Rainich a tha cho titheach air na craobhan-beithe.
Annasan nan ràithean
An t-Earrach
Bidh ceilearachd bhinn air feadh na coille agus bidh grunnd na coille na bhrat dathach de dh’fhlùraichean-fiadhaich.
An Samhradh
Bidh dealanan-dè air uideal timcheall air an Tèarmann agus os cionn nan lochanan bidh tairbh-nathrach agus cruinneagan a’ sealg fhrìdeagan.
Am Foghar
Bidh a’ choille-bheithe eireachdail na dathan drùidheach an fhoghair agus cùm sùil a-mach airson na bhios ann de dh’fhungas. Tha cothrom ann gun cluinn thu langan na h-earba cuideachd.
An Geamhradh
’S e àm mìorbhaileach a th’ ann beanntan sneachdach a’ Mhonaidh Ruaidh fhaicinn bho àite-seallaidh an Tèarmainn.
![Scottish Outdoor Access Code](/sites/default/files/styles/embedded/public/2023-03/Set_text_1A_Gaelic%202021%20blue.png?itok=DIYZgQM1)
Fiosrachadh feumail
Faodaidh coin dragh a chur air fiadh-bheatha. Cùm coin air iall ghoirid no fo smachd teann aig amannan cugallach agus gabh suim do shanasan sam bith a chì thu.
![Common Lizard warming its self on a rock](/sites/default/files/styles/embedded/public/2023-07/Lizard_jpg_JPEG%20Image%20Original%20Size_m42644.jpg?itok=-jfhVYjx)
Lean slighe
Tha pannal aig an t-slighe a-steach don Tèarmann air a bheil fiosrachadh mu cheithir slighean coiseachd. Tha iad uile air an comharrachadh le dathan is samhlaidhean. Bidh na slighean seo a’ fàs nas dùbhlanaiche mar as àirde a thèid thu ris an leathad.
Cùm sùil a-mach cuideachd do shanasan air a bheil fiosrachadh mu iùl-èisteachd mun Tèarmann. Faodar èisteachd ris air fòn-làimhe.
Mapa an tèarmainn
Slighean
![duck blue icon](/sites/default/files/styles/trail_path_theme/public/icons/NNR%20path%20grading%20-%20trail%20symbols%20-%20duck%20-%20blue.jpg?itok=RnbUcDWN)
Lochan
![dragonfly icon](/sites/default/files/styles/trail_path_theme/public/icons/NNR%20path%20grading%20-%20trail%20symbols%20-%20dragonfly%20-%20purple.jpg?itok=EzQW4OFu)
Clamhan
![Lighthouse icon](/sites/default/files/styles/trail_path_theme/public/icons/Lighthouse%20-%20yellow-01.png?itok=Mhi3o6-m)
Coille
![village icon](/sites/default/files/styles/trail_path_theme/public/icons/NNR%20path%20grading%20-%20trail%20symbols%20-%20village%20-%20red.jpg?itok=sVBHSDjR)
Àite-seallaidh
![Bog pool at Craigellachie National Nature Reserve](/sites/default/files/styles/embedded/public/2023-09/BogPool-D9432.jpg?itok=-Z5b9v5Y)
![Heather, bracken amd silver birch trees, Craigellachie National Nature Reserve](/sites/default/files/styles/embedded/public/2023-09/Craigellachie-D6426_01_JPG_JPEG%20Image%20Original%20Size_m21084.jpg?itok=EEiZFZiY)
An tuilleadh fiosrachaidh
- A' tadhal air an tèarmann
- Mu dheidhinn an tèarmainn
- Tadhal air na tèarmainn nàdair eile againn